Christian Dior Miss Dior Blooming Bouquet

Christion Dior ətir kolleksiyası ilə tanışlığım məhz bu gözəllə başladı deyə bilərəm. Əvvəllər ətir seçimində bu qədər "yüz ölçüb bir biçən" adam deyildim. Bu ətri ilk dəfə yerli saytların birindən bir xanımdan ayaqüstü test edib almışdım, əlbəttə onda Aromania.az hələ yox idi. O zamanlar o qədər təcrübəsiz idim ki, heç ətrin notları barədə öncədən məlumat da toplamayıb getmişdim xanımla görüşə. Əslində parfümeriyada qızılgül-müşk kombinasiyasının üzərimə nə qədər gözəl "oturduğunu", özümə yaraşdırdığımı, burnumu yormadan və başımı ağrıtmadan gün ərzində qulağıma necə incə-incə gəldiyini də Blooming Bouquet sayəsində öyrənmiş oldum. İlahi, necə gözəl ətirdir. Portağal, şaftalı, pion, qızılgül və müşk notları ilə qurulmuş piramida, qışqırmayan, yormayan, zərif və duyğulu şleyf.. Blooming Bouquet sakit, ofis mühitinə uyğun bahar-yay ətridir. Kifayət qədər qalıcıdır, paltarda yuyulduqdan və ütüləndikdən sonra belə burna yaxınlaşdırıb eşitmək olur. Bu ətirdə "çimsəniz" belə, ətrafdakıları yormayacaqsınız məncə. Yay ətirlərim sırasında favoritlərimdən biridir.