Tom Ford - tərzi ilə dünyanı ələ keçirən şəxs!

Tom Ford — dəb dizayneri və kinorejissordur. O, 1961-ci ildə Amerikanın Texas ştatında dünyaya gəlmişdir. O, Texas əsilli olsa da, uşaqlığının çox hissəsini Yeni Mexiko da keçirib. Anası ona həmişə gözəl geyinməyi tövsiyə edirdi. Səliqəsiz geyimlərin qarşıdakı insanlara hörmətsizlik olduğunu bildirirdi. 12 yaşında anasının ona Gucci brendindən ayaqqabı alması onun həyatında dönüş nöqtəsi oldu və məktəbi burada bitirib. Memarlıq sahəsində təhsil alan Tom Ford təhsilini yarımçıq atır və moda dünyasına qatılır.

O, 1994-cü ildə Gucci şirkətininin kreativ direktoru oldu və italyan brendini dünyanın ən məşhur brendləri arasına saldı. Belə ki, böyük sıxıntılar yaşayan "Gucci" şirkətinin illik gəlirinin 90% artmasında Tom Fordun əvəzsiz rolu olmuşdur. 2000-ci ildə Gucci ilə Yves Saint Laurent brendi birləşir və Tom Ford bu dəfə də YSL brendinin baş dizayneri olur. 2004-cü ilə qədər bu vəzifələrdə çalışaraq şirkətin illik gəlirlərini 230 milyondan 3 milyarda qədər artırır. 2004-cü ildə o, Gucci ilə yaşadığı problemlərdən sonra o şirkəti tərk edir. Bu hadisədən sonra onun məşhurluğu daha da artmağa başlayır, ona bir çox iş təklifləri gəlir. O "Estee Lauder" şirkəti ilə əməkdaşlığı seçir. Buradakı fəaliyyəti ərzində iki xüsusi kosmetika növləri istehsal etməyə başlayır. Bunlardan ən məşhuru da Amber Nude adlanırdı.

Heç kimin gözləmədiyi anda Guccidən ayrılan Tom Ford 2 il sonra 2006-cı ildə öz şəxsi brendi altında şirkətini yaradaraq, ən dəbli brendlərdən birinə çevrilə bilir. İlk öncə eynəklərlə başlayan uğur, daha sonra ətirlər, kişi və qadın geyimləri ilə davam edir. Parfümeriya sahəsinə də bundan sonra diqqət yetirməyə başlayır. Tom Ford "Estee Lauder" brendi üçün Youth Dew ətrini yeniləyir və öz ətrinin yaradılması ilə bağlı danışıqlara başlayır.

2006-cı ildə o, brendin ilk - Black Orchid ətrini satışa çıxarır. Bu ətrin yaradılmasında nadir bitkilərdən hesab olunan qara orxideya çiçəyindən istifadə olunmuşdur. Eksklüzivliyi ilə başqa ətirlərdən seçilən bu parfüm Tom Fordun şah əsəri hesab olunur. Həm qadınlar, həm də kişilər tərəfindən çox sevilən Tom Ford Black Orchid Unisex ətri hal-hazırda Top 10 parfümlərdən hesab olunur. Black Orchid Unisex ətri brendin ilk ətridir, satışa çıxarıldığı andan indiyə qədər parfüm öz möhtəşəmliyini qoruyub saxlamışdır.

Tom Fordun ən böyük uğurlarından biri də onun dünyanın ən məşhur insanları ilə işləməyində, onllarla yaxın dostluq münasibətində olmasındadır. Madonna, Rihanna, Beyonce, Justin Timberlake kimi məşhurlar konsertlərində, mükafatlandırma mərasimlərində Tom Fordun geyimlərindən istifadə ediblər ki, bu da brendin tanıtımının artmasında mühüm rol oynamışdır.

Əvvəldə də qeyd etdiyimiz kimi Tom Ford dizaynerlikdən əlavə həmçinin kino sənəti ilə də məşğuldur. Cəmi 2 filmə rejissorluq etsə də, kino dünyasında da adından söz açdırmağı bacarmışdır. 2009-cu ildə ilk filmi "A Single Man" ilə 66-cı Venesiya Film Festivalında “Qızıl Aslan Mükafatı” na namizəd göstərildiyindən, istedadının təkcə moda ilə limitli olmadığını da sübut etmiş oldu. 2016-cı ildə ise, ssenari müəllifi olduğu və rejissorluq etdiyi "Nocturnal Animals" adlı film isə hər kəs tərəfindən olduqca bəyənildi, ilin ən yaxşı filmlərindən biri olduu.

Tom Forddan uğurlarının səbəbi haqqında soruşulduqda cavabı belə olmuşdur: "İstedadım hamı qədərdir. Yüksəlməyimə səbəb çox çalışmağımdır. Çox çalışmasaydım, çox güman bədbəxt biri olardım!" Ford günün sadəcə 2-3 saatını dincəlir, başında canlandırdığı ideyaları mütləq həyata keçirməyə çalışırdı. Bu çalışqanlıq onu ikon səviyyəsinə kimi qaldırır. 56 yaşlı dizayner hal-hazırda dünyanın ən çox sevilən, qibtə edilən şəxslərindəndir. Tom Ford öz brendini yaradana qədər, bütün dəb dünyasında art-direktor olaraq ən çox gəlir qazanan dizaynerlərdən biri idi. Dünyanın ən qabaqcıl jurnallarından olan "Vogue" onu "Tərzi ilə dünyanı ələ keçirən şəxs" adlandırır.