Koko Şanel - dəb ikonası!

Koko Şanel - dəb ikonası!
30 oktyabr 2017 1956

Koko Şanel - dəb ikonası!

Koko Şanel - məşhur fransız modelyer, dizayner, ətriyyatçısıdır, o bir dəb ikonasıdır. Şanel dizaynerlər arasında yeganə şəxsdir ki, "Time" jurnalının "XX-ci əsrin 100 ən önəmli insanı "siyahısında yer alıb. Dizaynerin əsl adı Qabrieladır. "Koko" adı isə onun tez-tez ifa elədiyi, sevdiyi “Ko Ko Ri Ko” və “Qui qua vu Coco” mahnısından götürülmüşdür. Şanel adı deyilən zaman hər kəsin ağlına tərz, zəriflik, gözəllik gəlir. Koko Şanel XX əsr Avropa qadınlarının davranış və geyimlərində inqilab edən şəxs olmuşdur. Belə ki, xanımlar arasında qısa saç düzümü məhz Şanelin saçlarını bu formaya salmasından sonra dəbə minmişdir.

1883-cü ildə Fransada dünyaya gələn Koko Şanelin həyatı heç də asan olmamışdı. 18 yaşından geyim dükanında satıcı kimi işləyən dizayner boş vaxtlarında isə kabaredə mahnı oxuyurdu. Onun tanışları, dostları sırasında məşhur musiqiçi və rəssamlar, hersoq və knyazlar vardı. Məşhur dizayner 1910-ci ildə Parisdə özünün geyim dükanını açır, burda əsasən şlyapalar satılırdı. Koko Şanel 1912-ci ildə isə özünün "Şanel Moda evi"ni açır. Amma birinci dünya müharibəsi onun bu işini yarıda qoyur. Yalnız müharibədən sonra - 1919-cu ildə "Şanel Moda evi" fəaliyyətini bərpa edir. O başladığı bütün işlərin öhdəsindən uğurla gəlirdi. Şanel öz dizaynlarında sadəliyə və rahatlığa üstünlük verirdi.

1921-ci ildə əfsanəvi, möhtəşəm Chanel No 5 ətri meydana çıxdı. Ətir parfümeriya sahəsində bir yenilik hesab olunur. Belə ki, Şanel No 5 ətrinə qədər qadın ətirləri heç də sərt iylərə sahib deyildilər. Koko özü bu ətri belə təsvir etmişdir: "Bu, bir gülün yox, bütün bağçanın ətridir." Dünyanın bir çox məşhurları, Jaklin Kennedi, Merlin Monro və başqaları hər zaman bu ətirdən istifadə edirdi. Bu Koko Şanel üçün çox böyük uğur idi. Yaranmasından artıq 1 əsr keçməsinə baxmayaraq Şanel No 5 ətri hələ də dünyada ən çox satılan ətirdir.

1939-cu ildə ikinci dünya müharibəsi zaman Şanel bütün mağazalarını bağladı. Onun adı siyasi qalmaqallarda hallandı, hətta həbs də olundu. 1940-cı illərdə Fransada Kristian Diorun moda aləminə gəlişi Şanel üçün daha bir zərbə oldu. Şanelin qadınlar üçün yaratdığı rahat və sadə geyimlər yavaş-yavaş aradan çəkilirdi. Bir vaxtlar dəbdə olan darıxdırıcı, rahat olmayan geyimlər yenidən dəbə qayıdırdı. Amma Şanel bu geyimlərin tezliklə bəyənilməyəcəyini bilirdi. Ehtimalları onu aldatmadı. Koko Şanel yenidən öz işinə qayıdır. Çoxsaylı insanlar yenidən Şanel markalı geyimlərə üstünlük verməyə başladılar.

Dövrünün bir çox məşhur kişiləri ilə eşq həyatı yaşasa da Koko Şanel heç vaxt ailə həyatı qurmamışdır. Bu mövzuda ona sual verdikdə isə cavabı belə olmuşdur: "Bugünə qədər dünyada bir çox Vestminister hersoqinyası olmuşdur, amma bu dünyada yalnız bir Şanel var." Koko Şanel 88 il ömür yaşadı. Onu hələ sağlığında "moda aləminin filosofu" adlandırırdılar.

2009-cu ildə məşhur fransız aktrisası Audrey Tatunun iştirakı ilə Şanelin həyatından bəhs edən "Coco before Chanel" adlı film çəkilmişdir.

 

Dİgər xəbərlər Bütün xəbərlər
Live chat
0558597777 WhatsApp