Kilian Playing With The Devil

İki valehdici Tom Ford ətrindən sonra niş parfumeriyanı Kilian brendinin qismində məhz bu ətirlə kəşf ettim. Əslində meyvə və çiçək qoxulu, şirin ətirlərin pərəstişkarı olduğumu deyə bilmərəm, fəqət niş parfumeriyada notlar başqa cür çaldığı üçün insanın qoxubilmə qabiliyyəti bir növ təkmilləşir, həm də prioritetləri azacıq da olsa dəyişir. Bu - heç də alışmış olduğumuz banal bahar-yay ətirlərinə bənzəmir. Olduqca dərin, qeyri-adi, insanı riqqətə gətirən, yatmış xatirələri oyadan və deyərdim ki, cilddən-cildə girə bilən bir ətirdir. İlk toxunuşda burnunuz kəskin olmayan istiot notları ilə "qıcıqlanır", daha sonra ətir dəridə pərvazlanaraq təravətli moruq və utancaq qızılgül, vanil, portağal və şaftalı qoxusu ilə artıq təkcə sahibəsini deyil, həm də ətrafdakıları məftun etməyə başlayır. İlk toxunuşda biraz ağır hiss edilə bilər, fəqət dəriyə hopub açıldıqdan sonra olduqca xoş, yormayan, baş ağrıtmayan ətrə çevrilir. "Şeytanla oyun" ətrafdakılardan kompliment alacağınıza zəmanətdir. Bu - əsl qızmar yay ətridir. Fikrimcə, həm gün ərzində, həm də gecə ətri kimi istifadə edilə bilər. Olduqca qalıcıdır, özündən sonra gözəl şleyf buraxır. Bunu ətrafdakıların reaksiyasından asanlıqla bilmək olur. Səhər evdən çıxmazdan əvvəl qulaq arxasına ikicə toxunuş kifayət edir ki, özünüzü bütün gün ərzində təravətli meyvə bağında yatmış gözəl kimi hiss edəsiniz. Dəridə yuyuyandan sonra belə, paltarda isə yumadan sonra hiss edilir. Çılğın, özünə güvənən, daim hərəkətdə olan qadınların ətridir. Kütlədə seçilmək və ətrinizlə yadda qalmaq istəyirsinizsə, məncə Şeytana uyun.