Christian Dior Midnight Poison

Test etmədən, kor-koranə aldığım və dəli olduğum Gecəyarı zəhəri. "Torpada pişik" üsulu ilə aldığım yeganə ətirdir ki, istehsalının dayandırılmasına çox heyfsilənirəm. Nə yaxşı ki, Aromania.az var, dadımıza yetişir :) Bu əsərdə bütün notlar yerindədir - portağal, berqamot, parfümeriyada az qala şamla axtardığım qızılgül, habelə ənbər, vanil və paçuli. Bu notlardan qurulmuş piramida ancaq bu qədər məftuedici ola bilərdi. Ətir ensiklopediyasında Christian Dior ətir evinin bu nümayəndəsi şirin qoxulu olaraq səciyyələndirilsə də, mənə görə bir çox şirin-vanil qoxulu ətirlərə nisbətən ağır deyil, əlbəttə, doza həddini aşmadığınız təqdirdə. Zənnimcə, adından da bəlli olduğu kimi, daha çox gecə ziyafətlərinə yaraşan ətirdir, lakin həddini aşmadan bu gözələ gün ərzində də bürünə bilərsiniz. Dərin, seksual, məstedici şleyfi ilə heç kimi biganə qoymayan bu zəhər içilməyə dəyər.